Rev 21 | KhmKCB | STEP | បន្ទាប់មក ខ្ញុំបាន ឃើញ ផ្ទៃ មេឃ ថ្មី និង ផែនដី ថ្មី ដ្បិត ផ្ទៃ មេឃ មុន និង ផែនដី មុន បាន បាត់ ទៅ ក៏ គ្មាន សមុទ្រ ទៀត ឡើយ

Revelation of John 21

1 បន្ទាប់មកខ្ញុំបានឃើញផ្ទៃមេឃថ្មីនិងផែនដីថ្មីដ្បិតផ្ទៃមេឃមុននិងផែនដីមុនបានបាត់ទៅក៏គ្មានសមុទ្រទៀតឡើយ 2 ហើយខ្ញុំបានឃើញក្រុងបរិសុទ្ធជាក្រុងយេរូសាឡិមថ្មីចុះមកពីស្ថានសួគ៌គឺមកពីព្រះជាម្ចាស់ទាំងបានរៀបចំរួចជាស្រេចដូចកូនក្រមុំតុបតែងខ្លួនទទួលប្ដី។ 3 ខ្ញុំបានឮសំឡេងមួយយ៉ាងខ្លាំងចេញពីបល្ល័ង្កមកថា៖ «មើល៍រោងរបស់ព្រះជាម្ចាស់បាននៅជាមួយមនុស្សហើយព្រះអង្គនឹងតាំងលំនៅក្នុងចំណោមពួកគេពួកគេនឹងធ្វើជាប្រជារាស្រ្ដរបស់ព្រះអង្គហើយព្រះជាម្ចាស់ផ្ទាល់នឹងនៅជាមួយពួកគេ 4 ព្រះអង្គនឹងជូតអស់ទាំងទឹកភ្នែកចេញពីភ្នែករបស់ពួកគេហើយនឹងលែងមានសេចក្ដីស្លាប់ទុក្ខព្រួយសម្រែកទ្រហោយំឬការឈឺចាប់ទៀតហើយដ្បិតអ្វីៗកាលពីមុនបានបាត់អស់ទៅហើយ»។ 5 ព្រះអង្គដែលគង់លើបល្ល័ង្កមានបន្ទូលថា៖ «មើល៍យើងធ្វើអ្វីៗទាំងអស់ជាថ្មី»។ ព្រះអង្គមានបន្ទូលទៀតថា៖ «ចូរសរសេរទុកចុះដ្បិតពាក្យទាំងនេះជាពាក្យដ៏ពិតហើយគួរឲ្យជឿ»។ 6 បន្ទាប់មកព្រះអង្គមានបន្ទូលមកខ្ញុំថា៖ «ការបានសម្រេចហើយយើងជាអាលផានិងជាអូមេកាជាដើមដំបូងនិងជាចុងបំផុត។ អ្នកណាដែលស្រេកយើងនឹងឲ្យផឹកពីប្រភពទឹកជីវិតដោយឥតគិតថ្លៃ។ 7 អ្នកណាមានជ័យជម្នះនឹងទទួលបានសេចក្ដីទាំងនេះជាមរតកយើងនឹងធ្វើជាព្រះរបស់អ្នកនោះហើយអ្នកនោះនឹងធ្វើជាកូនរបស់យើង។ 8 ប៉ុន្ដែសម្រាប់ពួកកំសាកពួកមិនជឿពួកគួរស្អប់ខ្ពើមពួកឃាតកពួកប្រព្រឹត្ដអំពើអសីលធម៌ខាងផ្លូវភេទពួកមន្ដអាគមពួកថ្វាយបង្គំរូបព្រះនិងពួកភូតភរទាំងអស់ពួកគេនឹងមានចំណែកនៅក្នុងបឹងដែលឆេះដោយភ្លើងនិងស្ពាន់ធ័រ។ នេះហើយជាសេចក្ដីស្លាប់ទីពីរ»។ 9 បន្ទាប់មកទេវតាមួយរូបក្នុងចំណោមទេវតាទាំងប្រាំពីរដែលកាន់ពានទាំងប្រាំពីរពេញដោយគ្រោះកាចចុងក្រោយទាំងប្រាំពីរបានចូលមកហើយនិយាយមកខ្ញុំថា៖ «ចូលមកខ្ញុំនឹងបង្ហាញឲ្យអ្នកឃើញកូនក្រមុំដែលជាប្រពន្ធរបស់កូនចៀម»។ 10 ទេវតានោះក៏នាំខ្ញុំទៅលើភ្នំមួយយ៉ាងធំហើយខ្ពស់ពេលដែលខ្ញុំលង់ក្នុងវិញ្ញាណរួចបង្ហាញឲ្យខ្ញុំឃើញក្រុងបរិសុទ្ធគឺជាក្រុងយេរូសាឡិមដែលចុះមកពីស្ថានសួគ៌គឺមកពីព្រះជាម្ចាស់ 11 ទាំងមានសិរីរុងរឿងរបស់ព្រះជាម្ចាស់ហើយពន្លឺរស្មីរបស់ក្រុងនោះដូចជាត្បូងដ៏មានតម្លៃគឺដូចជាត្បូងមណីជោតិរសថ្លាដូចកែវចរណៃ។ 12 ក្រុងនោះមានកំផែងធំហើយខ្ពស់មានទ្វារដប់ពីរហើយនៅទ្វារទាំងនោះមានទេវតាដប់ពីររូបរួចនៅលើទ្វារទាំងនោះមានសរសេរឈ្មោះដែលជាឈ្មោះរបស់កុលសម្ព័ន្ធទាំងដប់ពីររបស់ពួកកូនចៅអ៊ីស្រាអែល។ 13 នៅទិសខាងកើតមានទ្វារបីទិសខាងជើងមានទ្វារបីទិសខាងត្បូងមានទ្វារបីនិងទិសខាងលិចមានទ្វារបី។ 14 រីឯកំផែងរបស់ក្រុងនោះមានគ្រឹះដប់ពីរហើយនៅលើគ្រឹះទាំងនោះមានឈ្មោះទាំងដប់ពីររបស់សាវកទាំងដប់ពីររបស់កូនចៀម។ 15 ទេវតាដែលនិយាយជាមួយខ្ញុំនោះមានកាន់ដំបងមាសមួយជារង្វាស់សម្រាប់វាស់ក្រុងទ្វារនិងកំផែងក្រុង។ 16 ក្រុងនោះមានរាងបួនជ្រុងស្មើគ្នាគឺបណ្ដោយនិងទទឹងស្មើគ្នា។ ទេវតានោះបានវាស់ក្រុងដោយដំបងនោះឃើញមានមួយម៉ឺនពីរពាន់ស្ដេឌៀហើយបណ្ដោយទទឹងនិងកំពស់របស់ក្រុងនោះមានប្រវែងស្មើគ្នា។ 17 ទេវតាក៏បានវាស់កំផែងក្រុងឃើញមានមួយរយសែសិបបួនហត្ថតាមរង្វាស់របស់មនុស្សដែលទេវតាប្រើ។ 18 កំផែងក្រុងធ្វើពីត្បូងមណីជោតិរសហើយក្រុងនោះធ្វើពីមាសសុទ្ធដែលថ្លាដូចកែវសុទ្ធ។ 19 គ្រឹះរបស់កំផែងក្រុងនោះតុបតែងដោយត្បូងដ៏មានតម្លៃគ្រប់ប្រភេទគ្រឹះទីមួយគឺជាត្បូងមណីជោតិរសទីពីរគឺជាត្បូងកណ្ដៀងទីបីគឺជាត្បូងមោរ៉ាទីបួនគឺជាត្បូងមរកត 20 ទីប្រាំគឺជាត្បូងសាមស៊ីទីប្រាំមួយគឺជាត្បូងពិទាយទីប្រាំពីរគឺជាត្បូងប៊ុតលឿងទីប្រាំបីគឺជាត្បូងបេរីលទីប្រាំបួនគឺជាត្បូងទោប៉ាត់ទីដប់គឺជាត្បូងយក់ទីដប់មួយគឺជាត្បូងនិលទីដប់ពីរគឺជាត្បូងត្របែក។ 21 ទ្វារទាំងដប់ពីរធ្វើពីគជ់ដប់ពីរទ្វារនីមួយៗធ្វើពីគជ់មួយហើយផ្លូវរបស់ក្រុងនោះធ្វើពីមាសសុទ្ធដែលថ្លាដូចកែវ។ 22 ខ្ញុំមិនឃើញមានព្រះវិហារនៅក្នុងក្រុងនោះទេដ្បិតព្រះអម្ចាស់ជាព្រះដ៏មានព្រះចេស្ដាលើអ្វីៗទាំងអស់ព្រមទាំងកូនចៀមគឺជាព្រះវិហាររបស់ក្រុងនោះ។ 23 ក្រុងនោះមិនត្រូវការព្រះអាទិត្យឬលោកខែដើម្បីបំភ្លឺឡើយដ្បិតសិរីរុងរឿងរបស់ព្រះជាម្ចាស់បានបំភ្លឺក្រុងនោះហើយរីឯកូនចៀមក៏ជាចង្កៀងរបស់ក្រុងនោះដែរ។ 24 ជនជាតិទាំងឡាយនឹងដើរនៅក្នុងពន្លឺរបស់ក្រុងនោះហើយពួកស្ដេចនៅលើផែនដីក៏នាំយកសិរីរុងរឿងរបស់ខ្លួនមកក្នុងក្រុងនោះដែរ 25 ហើយទ្វារក្រុងនោះមិនដែលបិទឡើយនៅពេលថ្ងៃដ្បិតនៅទីនោះគ្មានយប់ទេ 26 ពួកគេនឹងនាំយកសិរីរុងរឿងនិងកិត្ដិយសរបស់ជនជាតិទាំងឡាយមកក្នុងក្រុងនោះ 27 ហើយអ្វីៗដែលមិនស្អាតព្រមទាំងអ្នកដែលប្រព្រឹត្ដអំពើគួរស្អប់ខ្ពើមនិងសេចក្ដីភូតភរមិនអាចចូលក្នុងក្រុងនោះបានឡើយមានតែអស់អ្នកដែលមានឈ្មោះកត់ទុកក្នុងបញ្ជីជីវិតរបស់កូនចៀមប៉ុណ្ណោះទើបអាចចូលបាន។